ગુજરાતમાં Jioનો દબદબો, 10 વર્ષમાં શૂન્યથી 3.35 કરોડ ગ્રાહકો સુધી પહોંચ્યું

રિલાયન્સ Jioએ ગુજરાતમાં પોતાના 10 વર્ષના પ્રવાસ દરમિયાન ટેલિકોમ બજારનું ચિત્ર બદલી નાખ્યું છે. સપ્ટેમ્બર 2016માં વ્યાવસાયિક સેવા શરૂ કર્યા બાદ પ્રથમ મહિનામાં કંપની પાસે 14.6 લાખ ગ્રાહકો હતા, જે જૂન 2026 સુધીમાં વધીને 3.35 કરોડ થયા છે. TRAIના વાયરલેસ સબ્સ્ક્રાઇબર ડેટા મુજબ આ સમયગાળામાં જિયોના ગ્રાહકોમાં આશરે 320.9 લાખનો વધારો થયો છે.

2020માં ગુજરાતની નંબર-1 કંપની બની

જિયો ડિસેમ્બર 2020માં પ્રથમ વખત ગુજરાતની સૌથી મોટી મોબાઇલ ઓપરેટર બની હતી અને ત્યારથી તેણે ટોચનું સ્થાન જાળવી રાખ્યું છે. કંપનીએ જુલાઈ 2017માં એરટેલને પાછળ છોડ્યું હતું, જ્યારે ડિસેમ્બર 2020માં વોડાફોન આઇડિયાને પાછળ રાખીને પ્રથમ સ્થાન મેળવ્યું હતું. જૂન 2026 સુધીમાં ગુજરાતમાં કુલ 727 લાખ વાયરલેસ કનેક્શન હતા, જેમાંથી જિયો પાસે 335.5 લાખ ગ્રાહકો હતા.

Airtel વધ્યું, Vodafone Ideaના ગ્રાહકો ઘટ્યા

આ જ દાયકામાં એરટેલના ગ્રાહકો 86.8 લાખથી વધીને 158.4 લાખ થયા છે. બીજી તરફ વોડાફોન આઇડિયાનો સંયુક્ત ગ્રાહક આધાર 316.8 લાખથી ઘટીને 200.1 લાખ થયો છે. એપ્રિલ 2018માં કંપની પાસે 354.8 લાખ ગ્રાહકો હતા. BSNLના ગ્રાહકો પણ 39.8 લાખથી ઘટીને 33 લાખ થયા છે.

8થી વધુ ઓપરેટરમાંથી હવે માત્ર 4 મોટા ખેલાડી

2016માં ગુજરાતના ટેલિકોમ બજારમાં ટાટા, રિલાયન્સ કોમ્યુનિકેશન્સ, એરસેલ, ટેલિનોર અને વીડિયોકોન સહિત અનેક કંપનીઓ કાર્યરત હતી. આ કંપનીઓની સંયુક્ત ગ્રાહક સંખ્યા ઓગસ્ટ 2016માં 175 લાખ હતી, પરંતુ જુલાઈ 2019 સુધીમાં આ ઓપરેટરો બજારમાંથી બહાર થઈ ગયા. હવે ગુજરાતના વાયરલેસ બજારમાં મુખ્યત્વે Jio, Vodafone Idea, Airtel અને BSNL ચાર મોટા ઓપરેટર રહ્યા છે.

ગુજરાતનું મોબાઇલ બજાર પણ વધ્યું

જિયોના આગમન સાથે ગુજરાતમાં કુલ વાયરલેસ ગ્રાહકોની સંખ્યા પણ વધી છે. સપ્ટેમ્બર 2016માં ગુજરાતમાં લગભગ 633.7 લાખ કનેક્શન હતા, જે જૂન 2026 સુધીમાં વધીને 727 લાખ થયા છે. એટલે લગભગ 10 વર્ષમાં સમગ્ર બજારમાં આશરે 14.7%નો વધારો થયો છે.

આ પણ વાંચો: NSE IPOના પ્રાઇસ બેન્ડ પહેલાં જ GMP ₹285 પર પહોંચી

જૂન 2026માં કોની પાસે કેટલા ગ્રાહકો?

જૂન 2026ના TRAI ડેટા મુજબ ગુજરાતમાં જિયો 335.5 લાખ ગ્રાહકો સાથે પ્રથમ સ્થાને છે. ત્યારબાદ વોડાફોન આઇડિયા પાસે 200.1 લાખ, એરટેલ પાસે 158.4 લાખ અને BSNL પાસે 33 લાખ ગ્રાહકો છે. આ આંકડા દર્શાવે છે કે છેલ્લા દાયકામાં ગુજરાતના મોબાઇલ બજારમાં સૌથી મોટો ફેરફાર જિયોના ઝડપી વિસ્તરણથી આવ્યો છે.

અમારી WhatsApp ચેનલમાં જોડાવા નીચે આપેલી લિંક પર ક્લીક કરો

https://whatsapp.com/channel/0029VbDPNhHISTkJEDTirJ16