દેશમાં ડિજિટલ બેન્કિંગનો વધતો વ્યાપઃ Airtel Payment Bankએ વાર્ષિક ધોરણે રૂ.3,300 કરોડની આવક નોંધાવી

નવી દિલ્હીઃ Airtel Payment Bankએ નાણાકીય વર્ષ 2026-27નાં આવકે વાર્ષિક ધોરણે રૂ.3,300 કરોડની આવક નોંધાવી છે. જ્યારે ત્રિમાસિક ધોરણે તેની આવક રૂ. 830.5 કરોડ હતી, એમ બેન્કે સોમવારે જાહેર કરેલા નાણાકીય પરિણામમાં જણાવ્યું હતું.

કંપનીએ વર્તમાન નાણાકીય વર્ષના પ્રથમ ક્વાર્ટરમાં ગયા વર્ષના સમાન સમયગાળાના રૂ.777.4 કરોડ કરતાં વાર્ષિક ધોરણે 6.8નો થોડો વધારો નોંધાવ્યો છે. વર્તમાન નાણાકીય વર્ષના પ્રથમ ક્વાર્ટરમાં ચોખ્ખો નફો 19 કરોડ થયો, જે વર્ષ અગાઉના સમાન સમયગાળા દરમિયાનના નફાની તુલનાએ 82 ટકા વૃદ્ધિ નોંધાવે છે. કંપનીનો કાર્યકારી નફો વાર્ષિક ધોરણે 31 ટકા વધી રૂ. 107.5 કરોડ થયો છે.

કંપનીનું કસ્ટમર બેલેન્સ વાર્ષિક ધોરણે 17 ટકા વધીને 4,389 કરોડ રૂપિયા થયું છે. બચત ખાતામાં માસિક વ્યવહાર કરતાં યુઝર 23 ટકા વધીને 2.95 કરોડ થયા છે. જ્યારે બેન્કની ગ્રોસ મર્ચેન્ડાઇઝ વેલ્યુ (જીએમવી) રૂ. 4,523 અબજ થઈ છે.

ત્રિમાસિક કામગીરીની સમીક્ષા કરતા કંપનીના એમડી અને સીઇઓ અનુબ્રતા બિશ્વાસે જણાવ્યું હતું કે નાણાકીય વર્ષ 2026-27નો અમે મજબૂત પ્રારંભ કર્યો છે. ગ્રાહકોની સંખ્યા તે વાતનો પુરાવો છે કે ભારતમાં ડિજિટલ બેન્કિંગનો વ્યાપ વિસ્તરી રહ્યો છે. લોકોમાં હવે ડિજિટલ બેન્કિંગ સ્વીકાર્ય બની રહી છે. અમે સલામત, સરળ અને એક્સેસિબલ બેન્કિંગ સોલ્યુશન્સ માટે ફોકસ્ડ છીએ.

ક્વાર્ટર દરમિયાન બેન્કે ડિજિટલ પેમેન્ટ અને ડિજિટલ વ્યવહારના કારોબારમાં સતત વૃદ્ધિ જોઈ છે. ગ્રાહકોના રોજબરોજના દૈનિક ડિજિટલ વ્યવહારોમાં અને ચૂકવણીઓમાં અમારા પેમેન્ટ્સનો ઉપયોગ કરી રહ્યા છે. જ્યારે બેન્ક યુપીઆઈ આધારિત ઓટોપે મેન્ડેટમાં બીજા નંબરની બેન્ક છે.

એરટેલ પેમેન્ટ્સ બેન્કે 65 લાખથી વધુ નેશનલ કોમન મોબિલિટી કાર્ડ (એનસીએમસી) જારી કર્યા છે. તેના લીધે તે આ સેગમેન્ટમાં સૌથી વધુ કાર્ડ જારી કરનારમાં બીજા ક્રમે આવે છે. બેન્કે આ ઉપરાંત જણાવ્યું હતું કે તેની પ્રક્રિયા દર ત્રણમાંથી બે ટ્રાન્ઝિટ પેમેન્ટ્સને સમર્થન આપે છે. ગ્રામીણ ભારતમાં બેન્કના પાંચ લાખથી વધુ બેન્કિંગ પોઇન્ટ્સ છે. દર ચારમાંથી ત્રણ ગામને તે સેવા પૂરી પાડે છે. તે દર ચારમાંથી એક વ્યવહાર આધાર એનેબલ્ડ પેમેન્ટ સિસ્ટમમાં કરે છે. બેન્ક કરંટ એકાઉન્ટ્સ, સાઉન્ડ બોક્સીસ અને પેમેન્ટ સોલ્યુશન્સ દ્વારા બિઝનેસ-ટુ-બિઝનેસ ડિજિટલ પેમેન્ટ્સ કરે છે.