ByteDanceને $29.6 બિલિયનની મેગા લોન, ICBC અને HSBC સહિત 28 બેંકો જોડાઈ

TikTokની પેરેન્ટ કંપની ByteDanceએ આશરે $29.6 બિલિયનની મેગા લોન મેળવી છે. આ લોનમાં ચીનની મોટી બેંકો ઉપરાંત HSBC સહિત વિદેશી બેંકો પણ સામેલ છે. એશિયામાં આ વર્ષે ડોલરમાં મળેલી આ સૌથી મોટી લોનમાંથી એક છે. કંપનીએ શરૂઆતમાં $20 બિલિયનની લોન લેવાનું નક્કી કર્યું હતું. જોકે બેંકો તરફથી લોન માટે મજબૂત માંગ જોવા મળતાં તેનું કદ વધારીને $29.6 બિલિયન કરવામાં આવ્યું છે.

28 બેંકોમાંથી ચીનની બેંકોનો મોટો હિસ્સો

આ લોનમાં કુલ 28 બેંકો સામેલ છે. તેમાં ચીનની બેંકોનો સૌથી મોટો હિસ્સો છે. ICBCએ આશરે $3 બિલિયન આપવાની પ્રતિબદ્ધતા દર્શાવી છે. Bank of Chinaનો હિસ્સો $2.5 બિલિયન, જ્યારે China Construction Bankનો હિસ્સો $1.5 બિલિયન છે. કૂલ 15 ચીની બેંકો મળીને આશરે $18.9 બિલિયન, એટલે કે લોનના લગભગ 64% માટે પ્રતિબદ્ધ છે. બીજી તરફ, HSBC સહિત ત્રણ વિદેશી બેંકોની સંયુક્ત પ્રતિબદ્ધતા $1.5 બિલિયન છે.

AI માટે પણ મોટું ફંડિંગ

ByteDance આ નાણાંનો ઉપયોગ મુખ્યત્વે સામાન્ય કોર્પોરેટ જરૂરિયાતો માટે કરશે. સાથે જ કંપની પોતાની AI ક્ષમતાઓને વધુ મજબૂત અને વિસ્તૃત કરવા માટે પણ આ ફંડિંગનો ઉપયોગ કરશે. લોનની શરૂઆતની મુદત 3 વર્ષ છે, જેને વધારીને 5 વર્ષ સુધી લઈ જઈ શકાય છે.

આ પણ વાંચો: સોનાના ઊંચા ભાવ વચ્ચે લોકોની પસંદગી બદલાઈ, દાગીનાની માગ ઘટી, રોકાણ માટે સોનું વધ્યું

એશિયાની બીજી સૌથી મોટી ડોલર લોન

ByteDanceની આ લોન આ વર્ષે એશિયામાં બીજી સૌથી મોટી ડોલર-ડિનોમિનેટેડ લોન છે. તેના કરતાં મોટી SoftBankની $40 બિલિયનની બ્રિજ લોન છે, જે માર્ચમાં સાઇન થઈ હતી. ByteDanceએ અગાઉ 2024માં પણ મોટી લોન મેળવી હતી. ત્યારે કંપનીએ આશરે 20 બેંકો પાસેથી $10.8 બિલિયન એકત્ર કર્યા હતા.