Canva Layoffs: કેનવામાં 1,271 નોકરીઓ પર કાપ, કર્મચારીને યાદ આવી Googleની છટણી

Canva Layoffs: ડિઝાઇન પ્લેટફોર્મ કેનવાની છટણીની જાહેરાતે તેના એક કર્મચારીને ગૂગલમાં અનુભવેલી છટણી યાદ અપાવી છે. ઑસ્ટ્રેલિયાની કંપનીએ બુધવારે જાહેરાત કરી કે તે 1,271 નોકરીઓ કાપશે. આ સંખ્યા તેના કુલ કર્મચારીઓના આશરે 22% જેટલી છે. વૃદ્ધિની ગતિ ધીમી પડતાં કંપની પોતાની ટીમો કેવી રીતે કામ કરે છે અને ક્યાંથી કામ કરે છે, તેમાં ફેરફાર કરી રહી છે.

કેનવા ત્રણ ટીમોને એક કેમ કરશે?

વિદેશી મીડિયાનાં અહેવાલ મુજબ, કેનવા કામગીરી સરળ બનાવવા અને નિર્ણયો ઝડપથી લેવા માટે સંગઠનનું માળખું બદલી રહી છે. કંપનીનાં સહસ્થાપક અને સીઇઓ મેલની પર્કિન્સે જણાવ્યું કે આ ફેરફારની અસર ટીમોના માળખા, કામના સ્થળ અને કર્મચારીઓની જરૂરિયાત પર પડશે. કંપની પ્રોડક્ટ, ગ્રોથ અને પ્લેટફોર્મ ટીમોને એક જ પ્રોડક્ટ વિભાગ હેઠળ લાવશે. તેનો હેતુ એક ટીમથી બીજી ટીમને કામ સોંપવાના તબક્કા ઘટાડવાનો અને જવાબદારી સ્પષ્ટ કરવાનો છે. કંપની મેનેજમેન્ટના સ્તરો ઘટાડશે અને કેટલીક ભૂમિકાઓને એક કરશે.

‘આ પહેલાં પણ બન્યું છે’ એવો અનુભવ

કેનવાના સિનિયર પ્રોડક્ટ મેનેજર આર્ટેમી ઓલિને સોશિયલ મીડિયા પર લખ્યું કે ગૂગલમાં જોડાયાના લગભગ છ મહિના પછી ત્યાં પણ છટણી શરૂ થઈ હતી. તે સમયે તેઓ કર્મચારીઓના પ્રતિનિધિ તરીકે ચૂંટાયા હતા. તેમણે એ સમયને પોતાની કારકિર્દીના સૌથી મુશ્કેલ તબક્કામાંનો એક ગણાવ્યો હતો. કેનવામાં જોડાયાના સાત મહિના પછી આવેલી આ જાહેરાતથી તેમને એ જ અનુભવ ફરી થયો હોય એવું લાગ્યું. તેમણે જણાવ્યું કે તેઓ કેનવામાં કામ ચાલુ રાખશે, પરંતુ તેમની સાથે કામ કરનારા ઘણા સહકર્મીઓની નોકરી ગઈ છે. તેમણે અસરગ્રસ્ત સાથીઓને પોતાના સ્વાસ્થ્યનું ધ્યાન રાખવા અને અન્ય લોકોને નોકરી માટે રેફરલ કે ભલામણ દ્વારા મદદ કરવા અપીલ કરી હતી.

સિડની બનશે હેડક્વાર્ટર

કેનવા વધુ પ્રોડક્ટ ટીમોનું મુખ્ય કેન્દ્ર સિડનીમાં બનાવશે અને કેટલાક કર્મચારીઓને ત્યાં સ્થળાંતર કરવા કહેશે. જાન્યુઆરીથી ઘર અને ઑફિસ બંને જગ્યાએથી કામ કરતા મોટાભાગના કર્મચારીઓએ અઠવાડિયામાં બે થી ત્રણ દિવસ ઑફિસ આવવું પડશે. કંપની નોકરી ગુમાવનારા કર્મચારીઓને તેમના આગામી પ્રયાસો માટે 10,000 ડૉલરની ગ્રાન્ટ આપશે.

આ પણ વાંચો: ખજૂર કિલોએ ₹80થી ₹100 મોંઘી: પુરવઠો વધતાં ભાવ સ્થિર, કલમીનો ભાવ ₹480થી ₹650

આ પણ જુઓ:

Watch onYouTube