હુથી હુમલાથી ક્રૂડ ઓઈલમાં આગ, બ્રેન્ટ $114 નજીક, WTI પણ $100ને પાર

પશ્ચિમ એશિયામાં વધતા ભૂ-રાજકીય તણાવના કારણે વૈશ્વિક ઊર્જા પૂરવઠો ખોરવાઈ જવાની આશંકા વધી ગઈ છે. તેના પગલે શુક્રવારે ક્રૂડ ઓઈલના ભાવમાં તેજી જળવાઈ રહી. સાઉદી અરબના ઓઈલ ઈન્ફ્રાસ્ટ્રક્ચર પર હુથી બળવાખોરોના ડ્રોન હુમલા તથા હોર્મુઝની ખાડીમાં જહાજોના પરિવહન અંગે અનિશ્ચિતતાએ ઓઈલ બજાર પર દબાણ વધાર્યું છે.

બ્રેન્ટ ક્રૂડ વાયદો શુક્રવારે 58 સેન્ટ એટલે કે 0.5 ટકા વધીને 113.75 ડોલર પ્રતિ બેરલ પહોંચી ગયો હતો. આ પહેલા ગુરુવારે બ્રેન્ટ ક્રૂડે 4 મે પછીનું તેનું સર્વોચ્ચ સ્તર વટાવ્યું હતું. બીજીબાજુ અમેરિકાનો વેસ્ટ ટેક્સાસ ઈન્ટરમીડિયેટ (WTI) ક્રૂડ 66 સેન્ટ એટલે કે 0.7 ટકા વધીને 100.13 ડોલર પ્રતિ બેરલ પર ટ્રેડ કરતો જોવા મળ્યો હતો.

બ્રેન્ટ ક્રૂડના ભાવમાં 81 ટકાથી વધુનો ઉછાળો

સાપ્તાહિક આધારે બ્રેન્ટ ક્રૂ઼ડ સતત ત્રીજા સપ્તાહે તેજી સાથે બંધ થયો હતો જ્યારે WTIમાં છેલ્લા બે સપ્તાહની તેજી પછી આ સપ્તાહે ઘટાડાની સંભાવના છે. આ વર્ષે ક્રૂડ ઓઈલના ભાવમાં 81 ટકાથી વધુનો ઉછાળો આવ્યો છે. બ્રેન્ટ ક્રૂડ છેલ્લા એક સપ્તાહમાં 4.2 ટકા અને છેલ્લા એક મહિનામાં 12.5 ટકા મોંઘું થયું છે. વર્ષ 2026ની શરૂઆતથી અત્યાર સુધીમાં તેના ભાવમાં 81.4 ટકાનો વધારો નોંધાયો છે. આ તેજી ઊર્જા બજારો પર ભૂ-રાજકીય અનિશ્ચિતતાની ઊંડી અસર દર્શાવે છે.

31 માર્ચ 2026ના રોજ વૈશ્વિક બેન્ચમાર્ક બ્રેન્ટ ક્રૂડ અંદાજે 118 ડોલર પ્રતિ બેરલના વાર્ષિક ઉચ્ચ સ્તરે પહોંચી ગયો હતો. હાલ તે સ્તરથી લગભગ 7 ટકા નીચે સ્તરે ટ્રેડ થઈ રહ્યો છે. જોકે, યુદ્ધ શરૂ થયા બાદ 1 જુલાઈ 2026ના રોજ તેના ભાવ ગગડીને 71.50 ડોલર પ્રતિ બેરલ થઈ ગયા હતા. આ નીચલા સ્તરથી અત્યાર સુધીમાં બ્રેન્ટ ક્રૂડમાં લગભગ 54 ટકાની જોરદાર રિકવરી થઈ છે.

સાઉદી અરબના ઓઈલ ક્ષેત્રો પર ડ્રોન હુમલા

સાઉદી અરબની સરકારી ઓઈલ કંપની સાઉદી અરામકોના શાયબાહ ઓઈલ ક્ષેત્ર પર ડ્રોન હુમલા અને એનર્જી ઈન્ફ્રાસ્ટ્રક્ચર તથા ઓઈલ ટેન્કરો પર હુથી બળવાખોરોએ હુમલા કરતા બજારની ચિંતા વધારી દીધી છે. મીડિયા રિપોર્ટ મુજબ ગુરુવારે સાઉદી અરબ અને યમન સ્થિત હુથી બળવાખોરો વચ્ચે યુદ્ધ તિવ્ર થયા પછી સાઉદી અરામકોએ ખાડી ક્ષેત્રમાં બહરીન પાસે સ્થિત ધહરાનમાં તેનું મુખ્યાલય ખાલી કરવાનો આદેશ આપ્યો હતો. ઓઈલ ઉત્પાદન કેન્દ્રો અને પૂરવઠા માર્ગો પર હુમલાના જોખમથી ક્રૂડ ઓઈલની ઉપલબ્ધતા પર અસર થવાની આશંકા છે. આ કારણે ભાવમાં જોખમ પ્રીમિયમ વધી ગયું છે. તેનો અર્થ એ છે કે સંભવિત પૂરવઠા અવરોધોના ડરથી બજારમાં ઓઈલના ભાવ સામાન્ય પરિસ્થિતિઓની સરખામણીમાં વધુ છે.

ઓઈલના ઊંચા ભાવથી ભારતની ચિંતા વધી

મધ્ય-પૂર્વમાં ચાલતા યુદ્ધ અને હોર્મુઝની ખાડીમાં ઓઈલ પરિવહન અંગે અનિશ્ચિતતાએ ક્રૂડ ઓઈલના ભાવને ઊંચા સ્તર પર જાળવી રાખ્યા છે. પૂરવઠામાં અવરોધો લાંબા સમય સુધી ચાલુ રહેશે તો વૈશ્વિક ઊર્જા બજાર પર દબાણ વધી શકે છે. ભારત જેવા ઓઈલ આયાત પર નિર્ભર દેશો માટે ક્રૂડ ઓઈલના સતત ઊંચા ભાવ આયાત બિલ, મોંઘવારી અને પેટ્રોલ-ડીઝલના ભાવ સંબંધિત ચિંતાઓ વધારી શકે છે. જોકે, ઘરેલુ ઈંધણના ભાવ પર વાસ્તવિક અસર સરકારી નીતિઓ, કરો, રૂપિયા-ડોલરના વિનિમય દર અને ઓઈલ કંપનીઓના નિર્ણયોની થાય છે.

આ પણ જૂઓ

Watch onYouTube