મોબાઇલ મેન્યુફેક્ચરિંગ માટે સરકારે જાહેર કરી ₹62,500 કરોડની યોજના

કેન્દ્ર સરકારે ભારતમાં મોબાઇલ ફોન મેન્યુફેક્ચરિંગ અને સ્થાનિક સપ્લાય ચેઇનને વધુ મજબૂત બનાવવા ₹62,500 કરોડની Mobile Phone Manufacturing Scheme લાગુ કરી છે. FY2026-27થી FY2030-31 સુધી ચાલનારી આ યોજનામાં ભારતમાં બનેલા મોબાઇલના પાત્ર વેચાણ પર 2.25%થી 5% સુધી નાણાકીય પ્રોત્સાહન મળશે. સ્થાનિક પાર્ટ્સ અને sub-assembliesની ખરીદી માટે કંપનીઓને વધારાનું 1.5% સુધી ઇન્સેન્ટિવ પણ મળી શકે છે.

માત્ર એસેમ્બલી નહીં, સ્થાનિક પાર્ટ્સ પર ભાર

નવી યોજનાનો મુખ્ય હેતુ મોબાઇલ ફોનની એસેમ્બલી સાથે તેના પાર્ટ્સ અને કમ્પોનન્ટનું ઉત્પાદન પણ દેશમાં વધારવાનો છે. કંપનીઓ જરૂરી પાર્ટ્સ અને sub-assemblies ભારતમાંથી ખરીદે તો તેમને વધારાનું પ્રોત્સાહન મળશે. તેનાથી સ્થાનિક સપ્લાયર્સ અને કમ્પોનન્ટ ઉત્પાદકો માટે પણ નવા બિઝનેસ અવસર ઊભા થઈ શકે છે.

₹39 લાખ કરોડ ઉત્પાદનનો લક્ષ્યાંક

સરકારને આશા છે કે યોજના હેઠળ આગામી પાંચ વર્ષમાં દેશમાં આશરે ₹39 લાખ કરોડના મોબાઇલ ફોનનું ઉત્પાદન થઈ શકે છે. આ સમયગાળા દરમિયાન આશરે ₹15 લાખ કરોડના મોબાઇલ ફોન નિકાસ કરવાનો લક્ષ્યાંક પણ રાખવામાં આવ્યો છે.

60,000 સીધી નોકરીઓની અપેક્ષા

યોજનાથી આશરે 60,000 સીધી રોજગારી સર્જાવાની અપેક્ષા છે. સાથે સપ્લાયર, લોજિસ્ટિક્સ, પેકેજિંગ અને અન્ય સંબંધિત ક્ષેત્રોમાં પણ રોજગારીની તકો વધી શકે છે. ભારતીય બ્રાન્ડ્સને પણ પ્રોત્સાહન યોજનામાં ભારતીય મોબાઇલ બ્રાન્ડ્સના વિકાસ પર પણ ભાર મૂકવામાં આવ્યો છે. સરકારનો હેતુ સ્થાનિક કંપનીઓની બ્રાન્ડ, ડિઝાઇન અને ઉત્પાદન ક્ષમતા વધારી તેમને વૈશ્વિક સ્તરે વધુ સ્પર્ધાત્મક બનાવવાનો છે. અગાઉની PLI યોજનાની સરખામણીએ નવી યોજનામાં માત્ર ઉત્પાદન વધારવા કરતાં domestic value addition અને local sourcing પર વધુ ભાર મૂકવામાં આવ્યો છે.