2026માં ભારતની OTT ઓડિયન્સ 66.49 કરોડની, માઇક્રો-ડ્રામાના દર્શકોમાં ધરખમ વધારો

ભારતમાં મનોરંજન ક્ષેત્રે OTT પ્લેટફોર્મનો વ્યાપ વધતો જાય છે. શહેરો અને ગ્રામ્ય વિસ્તારોમાં મોટી સ્ક્રીન સાથે નાની સ્ક્રીનના વપરાશકર્તાઓમાં ધરખમ વધારો વિદેશી કન્ટેન્ટને પણ અહીં ખેંચી લાવ્યું છે. Ormax OTT Audience Report મુજબ ભારતમાં OTT દર્શકોની સંખ્યા વાર્ષિક ધોરણે 11% વધીને 2026માં 66.49 કરોડ થઈ છે. બીજી તરફ, સક્રિય ચૂકવણીવાળા OTT સબ્સ્ક્રિપ્શનની સંખ્યા 16% વધીને 17.26 કરોડે પહોંચી છે.

આ રિપોર્ટ જૂન અને જુલાઈ 2026 દરમિયાન શહેરી તથા ગ્રામીણ ભારતના 15,000 લોકોના સર્વેના આધારે તૈયાર કરવામાં આવ્યો છે. રિપોર્ટના અંદાજ મુજબ, હવે ભારતની આશરે 45% વસ્તી ઓનલાઇન વીડિયો જુએ છે.

ભારતના ડિજિટલ મનોરંજન ક્ષેત્રનો ઝડપી વિકાસ કનેક્ટેડ ટીવીના વધતા ઉપયોગમાં પણ જોવા મળે છે. સક્રિય કનેક્ટેડ ટીવી દર્શકોની સંખ્યા 2025ની સરખામણીએ 60% વધીને 2026માં 20.69 કરોડે પહોંચી છે. આ વૃદ્ધિ દર્શાવે છે કે સ્માર્ટફોનની સાથે હવે મોટી સ્ક્રીન પર ઓનલાઇન કન્ટેન્ટ જોવાનું પ્રમાણ પણ ઝડપથી વધી રહ્યું છે. પરિણામે ભારતનું ડિજિટલ વીડિયો બજાર હવે અનેક સ્ક્રીન ધરાવતા વ્યવસ્થાતંત્ર તરીકે વિકસી રહ્યું છે.

ભારતમાં ઓનલાઇન વીડિયો જોવાનું પ્રમાણ વિવિધ પ્રકારના કન્ટેન્ટ અને પ્લેટફોર્મ પર સતત વધી રહ્યું છે. OTT દર્શકો દર અઠવાડિયે સરેરાશ 14.9 કલાક ઓનલાઇન વીડિયો જુએ છે. તેમાં સોશિયલ મીડિયા પ્લેટફોર્મ, માઇક્રો-ડ્રામા સેવાઓ અને મફત જાહેરાત આધારિત સ્ટ્રીમિંગ ટેલિવિઝન એટલે કે FAST ચેનલ્સના કન્ટેન્ટનો પણ સમાવેશ થાય છે.

આ આધારે ભારતમાં ઓનલાઇન વીડિયો જોવાનો કુલ વાર્ષિક સમય આશરે 517 અબજ કલાક હોવાનો અંદાજ છે. કન્ટેન્ટના પ્રકારોમાં માઇક્રો-ડ્રામાના દર્શકોની સંખ્યામાં સૌથી વધુ 50%ની વૃદ્ધિ નોંધાઈ છે. ત્યારબાદ કોરિયન ડ્રામાના દર્શકોમાં 48% અને એનિમેના દર્શકોમાં 32%નો વધારો થયો છે. આ ત્રણેય પ્રકારનું કન્ટેન્ટ ભારતમાં સૌથી ઝડપથી વધતા ડિજિટલ મનોરંજન સ્વરૂપોમાં સામેલ થયું છે.

FAST ચેનલ્સ પણ હવે ભારતીય દર્શકોમાં લોકપ્રિય થઈ રહી છે. આવી મફત અને જાહેરાત આધારિત સ્ટ્રીમિંગ ચેનલ્સના દર્શકોની સંખ્યા આશરે 3.52 કરોડ હોવાનું અનુમાન છે. ભારતનું ડિજિટલ ઓડિયો ક્ષેત્ર પણ નોંધપાત્ર કદ ધરાવે છે. દેશમાં દર મહિને સક્રિય રીતે ઓડિયો સ્ટ્રીમિંગ સેવાઓનો ઉપયોગ કરતા લોકોની સંખ્યા 22.73 કરોડ છે. તેમાંથી લગભગ 1.50 કરોડ વપરાશકર્તાઓ ચૂકવણીવાળી સેવાઓનો ઉપયોગ કરે છે.

રિપોર્ટમાં જણાવ્યા મુજબ, ભારતનાં 44 શહેરોમાં હવે OTT દર્શકોની સંખ્યા ઓછામાં ઓછી 10 લાખ છે. આ આંકડો દર્શાવે છે કે ડિજિટલ મનોરંજનનો ઉપયોગ હવે માત્ર મોટા મહાનગરો પૂરતો મર્યાદિત રહ્યો નથી, પરંતુ દેશના વિવિધ શહેરો અને વિસ્તારોમાં ઝડપથી વિસ્તરી રહ્યો છે.

આ પણ વાંચો: L&Tને ONGC પાસેથી ₹5,000 કરોડ સુધીનો ઓફશોર ઓર્ડર મળ્યો

અમારી WhatsApp ચેનલમાં જોડાવા નીચે આપેલી લિંક પર ક્લીક કરો

https://whatsapp.com/channel/0029VbDPNhHISTkJEDTirJ16