ખાંડ બાદ હવે ડુંગળીના ભાવમાં વધારો, મોટા શહેરોમાં ₹50-60 પ્રતિ કિલો!

દેશના અનેક વિસ્તારોમાં ડુંગળીના ભાવમાં ફરી તેજી જોવા મળી રહી છે. એક સપ્તાહમાં કેટલીક મુખ્ય મંડીઓમાં જથ્થાબંધ ભાવ 30-42% સુધી વધ્યા છે, જ્યારે દિલ્હી-NCR, મુંબઈ અને કોલકાતા જેવા મોટા શહેરોમાં ગ્રાહકોને ડુંગળી માટે ₹50થી ₹60 પ્રતિ કિલો ચૂકવવા પડી રહ્યા છે. નવા ખરીફ પાકની આવકમાં વિલંબ અને તહેવારો પહેલાં વધતી માંગને ભાવવધારાનું મુખ્ય કારણ માનવામાં આવી રહ્યું છે.

એક મહિનામાં સરેરાશ ભાવ 17% વધ્યો

21 ઓગસ્ટે દેશનો સરેરાશ છૂટક ડુંગળી ભાવ ₹40.79 પ્રતિ કિલો હતો, જે 21 જુલાઈના ₹34.87ની સરખામણીએ લગભગ 17% વધુ છે. ગયા વર્ષે 21 ઓગસ્ટે સરેરાશ ભાવ ₹28.72 પ્રતિ કિલો હતો. આ રીતે વાર્ષિક ધોરણે ભાવમાં 42%થી વધુનો વધારો થયો છે.

મોટા શહેરોમાં કેટલા ભાવ?

દિલ્હી-NCRમાં ડુંગળી આશરે ₹50-55 પ્રતિ કિલો, મુંબઈમાં ₹52-58 અને કોલકાતામાં ₹55-60 પ્રતિ કિલોના ભાવે વેચાઈ રહી છે. ચેન્નાઈમાં ભાવ ₹48-54, બેંગલુરુમાં ₹45-52 અને પટનામાં ₹48-55 પ્રતિ કિલો આસપાસ નોંધાયા છે.

લાસલગાંવમાં જથ્થાબંધ ભાવમાં તેજી

મહારાષ્ટ્રના લાસલગાંવ માર્કેટમાં એક સપ્તાહમાં જથ્થાબંધ ડુંગળીના ભાવમાં આશરે 30-42% વધારો નોંધાયો છે. અહીં ડુંગળી ₹3,195થી ₹3,600 પ્રતિ ક્વિન્ટલ સુધી પહોંચી છે, એટલે કે આશરે ₹32-36 પ્રતિ કિલો.

ભાવ કેમ વધી રહ્યા છે?

ખરીફ ડુંગળીની વાવણી અને નવા પાકની બજારમાં આવક મોડે થતાં પુરવઠો ઘટ્યો છે. સાથે તહેવારો પહેલાં માંગમાં વધારો થતાં માંગ-પુરવઠાનું અંતર વધી રહ્યું છે. અહેવાલ મુજબ સરકાર સપ્ટેમ્બરથી buffer stockમાંથી ડુંગળી બજારમાં છોડવાની તૈયારી કરી રહી છે. આવું થાય તો આવનારા અઠવાડિયામાં પુરવઠો વધવાથી ભાવ પર થોડું દબાણ આવી શકે છે.