રાજકોટની પેકેજિંગ કંપની Antala Industriesના IPOમાં QIB હિસ્સો બે કલાકમાં 50 ગણાથી વધુ ભરાયો

Antala Industries IPO: ગુજરાતના રાજકોટની Antala Industries Limited હવે શેરબજારમાં લિસ્ટિંગની દિશામાં આગળ વધી રહી છે. Antala Industriesનો IPO સબસ્ક્રિપ્શન માટે આજે 29 ઓક્ટોબરનાં રોજ ખુલ્યો છે જે 2 નવેમ્બર સુધી ખુલ્લો રહેશે, જેનાથી રોકાણકારોને બિડિંગ માટે ત્રણ દિવસનો સમયગાળો મળશે. Antala Industriesના IPOમાં QIB હિસ્સો ફક્ત બે કલાકમાં જ 50 ગણાથી વધુ ભરાઈ ગયો હતો. આ બતાવે છે કે કંપનીના IPOને કેટલો જબરદસ્ત પ્રતિસાદ મળી રહ્યો છે.

IPOમાં 46.80 લાખ નવા શેર રજૂ કરવાની યોજના

કંપનીનો પ્રસ્તાવિત IPO બુક-બિલ્ડિંગ પદ્ધતિથી આવશે. આ ઇશ્યૂમાં વધુમાં વધુ 46.80 લાખ નવા ઇક્વિટી શેર રજૂ કરવાની યોજના છે. આ ફ્રેશ ઇશ્યૂ હોવાથી તેના દ્વારા એકત્ર થનારી રકમ કંપનીના વ્યવસાયિક વિકાસ માટે ઉપયોગમાં લેવાશે. કંપની IPOમાંથી મળનારી રકમમાંથી ₹5.89 કરોડ હાલની ઉત્પાદન સુવિધામાં વધારાની મશીનરી ખરીદવા અને સ્થાપિત કરવા માટે ખર્ચવાની યોજના ધરાવે છે. જ્યારે ₹10.68 કરોડ વર્કિંગ કેપિટલની જરૂરિયાતો પૂરી કરવા માટે ફાળવવામાં આવશે. બાકીની રકમનો ઉપયોગ સામાન્ય કોર્પોરેટ હેતુઓ માટે કરવામાં આવશે. મશીનરીમાં રોકાણથી ઉત્પાદન ક્ષમતા વધારવા, કામગીરી વધુ કાર્યક્ષમ બનાવવા અને પ્રોડક્ટ પોર્ટફોલિયોનો વિસ્તાર કરવામાં મદદ મળવાની અપેક્ષા છે.

શું કામ કરે છે Antala Industries?

Antala Industries ઔદ્યોગિક અને વ્યાવસાયિક પેકેજિંગ પ્રોડક્ટ્સના ઉત્પાદન સાથે સંકળાયેલી કંપની છે. કંપની BOPP લેમિનેટેડ બેગ્સ, BOPP પ્રિન્ટિંગ અને લેમિનેશન રોલ્સ તથા પોલીપ્રોપિલીન (PP) વુવન બેગ્સ સહિતની પ્રોડક્ટ્સ બનાવે છે. કંપનીનાં પેકેજિંગ ઉત્પાદનોનો ઉપયોગ ફૂડ પ્રોસેસિંગ, ખાતર, કેમિકલ્સ, સિમેન્ટ અને બિયારણ જેવા વિવિધ ઉદ્યોગોમાં થાય છે. આ ઉપરાંત ચોખા, કઠોળ, લોટ, મસાલા, પેટ ફૂડ અને અન્ય કૃષિ તથા ઔદ્યોગિક ઉત્પાદનોના પેકેજિંગમાં પણ આ પ્રકારની બેગ્સ ઉપયોગી બને છે. કંપનીની સંકલિત ઉત્પાદન સુવિધા રાજકોટ જિલ્લાના વેરાવળ (શાપર) વિસ્તારમાં આવેલી છે. અહીં પ્રિન્ટિંગ, લેમિનેશન, કટિંગ, સ્ટિચિંગ અને ફિનિશિંગ જેવી કામગીરી કરવામાં આવે છે.

નાણાકીય વર્ષ 2025-26માં ₹47.40 કરોડની આવક

31 માર્ચ, 2026ના રોજ પૂરા થયેલા નાણાકીય વર્ષમાં Antala Industriesએ ₹47.40 કરોડની આવક નોંધાવી હતી. આ સમયગાળા દરમિયાન કંપનીનો કર બાદનો નફો (PAT) ₹4.24 કરોડ રહ્યો હતો. કંપનીના જણાવ્યા અનુસાર, તેના ગ્રાહકોમાં જાળવણીનો દર 63.14 ટકા રહ્યો હતો. કંપની ગુજરાત ઉપરાંત પશ્ચિમ બંગાળ, મહારાષ્ટ્ર, ઉત્તર પ્રદેશ, આસામ, રાજસ્થાન અને બિહાર જેવા રાજ્યોમાં પણ ગ્રાહકોને સેવા આપે છે. આવકમાં ગુજરાતનો સૌથી મોટો હિસ્સો છે, ત્યારબાદ મહારાષ્ટ્રનો ક્રમ આવે છે.

IPOનું સંચાલન કોણ કરશે?

Antala Industriesના પ્રસ્તાવિત IPO માટે Vatsa Capital Venture Private Limited એકમાત્ર બુક-રનિંગ લીડ મેનેજર તરીકે કાર્યરત છે. જ્યારે Bigshare Services Private Limited ઇશ્યૂના રજિસ્ટ્રાર તરીકે જવાબદારી સંભાળશે. કંપનીના પ્રમોટર્સ રાજેશકુમાર અંતાલા, ચેરમેન અને મેનેજિંગ ડિરેક્ટર, તથા પંકજકુમાર અંતાલા, હોલ-ટાઇમ ડિરેક્ટર છે. બંનેને પેકેજિંગ અને વુવન પ્રોડક્ટ્સ ઉદ્યોગમાં લગભગ ત્રણ દાયકાનો અનુભવ હોવાનું જણાવાયું છે.

આ પણ વાંચો: 46.80 લાખ નવા શેર સાથે શેરબજારમાં એન્ટ્રી મારશે Antala Industries

આ પણ જુઓ:

Watch onYouTube