Apple Mac Privacy: શું AI તમારી ખાનગી માહિતી વાંચી શકે? એપલ કડક કરશે ડેટા એક્સેસના નિયમો

એપલે Mac યુઝર્સના વ્યક્તિગત ડેટાની સુરક્ષા મજબૂત કરવા પ્રાઇવસી નિયંત્રણોમાં ફેરફાર કરવાની જાહેરાત કરી છે. કંપનીએ શુક્રવારે, 2 ઑક્ટોબર, 2026ના રોજ જણાવ્યું કે થર્ડ પાર્ટી સોફ્ટવેર, ખાસ કરીને આર્ટિફિશિયલ ઇન્ટેલિજન્સ આધારિત એજન્ટ્સને ડેટાની વ્યાપક પહોંચ આપવાથી જોખમ વધી શકે છે. આ ચિંતાને ધ્યાનમાં રાખીને કંપની macOSની ‘Full Disk Access’ પરવાનગી માટે વધારાના નિયંત્રણો રજૂ કરશે.

‘Full Disk Access’થી શું થાય છે?

‘Full Disk Access’ એવી પરવાનગી છે, જેના દ્વારા કોઈ એપ Macની સિસ્ટમમાં રહેલી ફાઇલો, ઇમેઇલ, મેસેજ અને બ્રાઉઝિંગ હિસ્ટ્રી સહિતના ડેટા સુધી વ્યાપક પહોંચ મેળવી શકે છે. એપલના જણાવ્યા અનુસાર, બેકઅપ એપ્સ કમ્પ્યુટર પર યોગ્ય રીતે કામ કરી શકે તે માટે આ સુવિધા બનાવવામાં આવી હતી. જોકે, તે યુઝર્સના ખાનગી ડેટાને સુરક્ષિત રાખતા સામાન્ય નિયંત્રણોને મોટા પ્રમાણમાં બાજુ પર રાખે છે. તેથી આ પરવાનગી આપવી ગોપનીયતાની દૃષ્ટિએ મહત્વપૂર્ણ નિર્ણય છે.

ડેવલપર્સના ઉપયોગ અંગે ચેતવણી

કંપનીએ જણાવ્યું કે કેટલાક ડેવલપર્સ આ સુવિધાનો એવી રીતે ઉપયોગ કરી રહ્યા છે, જે યુઝર્સને જોખમમાં મૂકી શકે છે. યુઝરને સંપૂર્ણ જાણકારી કે સમજણ વિના તેના કમ્પ્યુટરમાં રહેલી સંવેદનશીલ માહિતી એપની પહોંચમાં આવી શકે છે. એપલે ખાસ કરીને કોમ્યુનિકેશન એપ્સ અંગે પણ ચિંતા વ્યક્ત કરી છે. આવી એપ્સમાં વ્યાપક એક્સેસ મળવાથી સંબંધિત યુઝર ઉપરાંત તેની સાથે સંવાદ કરતા અન્ય લોકોની ગોપનીયતા પણ અસરગ્રસ્ત થઈ શકે છે.

સ્પષ્ટ મંજૂરી પર વધુ ભાર

નવા નિયંત્રણોનો હેતુ એ સુનિશ્ચિત કરવાનો છે કે કોઈ એપને આટલી વ્યાપક પહોંચ આપવા માટે યુઝરે સ્પષ્ટ અને ઇરાદાપૂર્વક પગલું ભરવું પડે. કંપની ઇચ્છે છે કે યુઝર્સ પરવાનગી આપતાં પહેલાં સમજે કે તેમની કઈ માહિતી ઉપલબ્ધ થઈ શકે છે અને તેની સાથે કયા જોખમો જોડાયેલા છે.

AI એજન્ટ્સની ક્ષમતા સાથે જોખમ પણ વધશે

એપલના જણાવ્યા અનુસાર, AI એજન્ટ્સ વધુ સક્ષમ અને સ્વતંત્ર બનશે તેમ વ્યાપક ડેટા એક્સેસ સાથે જોડાયેલા જોખમો નોંધપાત્ર રીતે વધશે. કંપનીએ ભાર મૂક્યો છે કે યુઝર્સ પોતાના ડેટા અને પ્રાઈવેસી અંગે માહિતીસભર નિર્ણય લઈ શકે તે જરૂરી છે. જાહેરાતમાં વધારાના નિયંત્રણો ક્યારે અમલમાં આવશે, તેમની ચોક્કસ રચના કેવી હશે અથવા macOSના કયા અપડેટમાં તેનો સમાવેશ થશે તેની વિગતો આપવામાં આવી નથી. હાલ કંપનીએ ફેરફારો લાવવાનો ઇરાદો જાહેર કર્યો છે.

આ પણ વાંચો: RBIના નવા નિયમો બાદ બેંકોને ₹4,000 કરોડનું નુકસાન! ફોરેક્સ ટ્રેડિંગમાં શું થયું?

આ પણ જુઓ:

Watch onYouTube