2027માં ક્રૂડ ઓઈલની માગમાં આવશે મોટો ઉછાળો, ભારત બનશે મોટું કારણ

દુનિયામાં ઓઈલની માગ આગામી વર્ષે તિવ્ર ગતિએ વધી શકે છે. પેટ્રોલિયમ નિકાસકાર દેશોના સંગઠન ઓપેક મુજબ 2027માં દુનિયામાં ઓઈલની માગ દરરોજ 24 લાખ બેરલ વધવાનો અંદાજ છે. ભારત અને એશિયાના અન્ય દેશ આ વધારામાં મહત્વની ભૂમિકા ભજવી શકે છે. ઓપેકના અંદાજ મુજબ 2026માં દુનિયામાં ઓઈલની સરેરાશ માગ દૈનિક 10.58 કરોડ બેરલ રહી શકે છે. 2027માં તે વધીને દૈનિક 10.82 કરોડ બેરલ પહોંચવાનો અંદાજ છે. એટલે કે એક વર્ષમાં દરરોજ ઉપયોગમાં લેવાનારા ઓઈલના પ્રમાણમાં અંદાજે દૈનિક 24 લાખ બેરલનો વધારો થઈ શકે છે.

ભારત અને એશિયામાં વધશે ઓઈલની માગ

ઓપેક મુજબ 2027માં ઓઈલની માગ વધારવામાં ભારત અને એશિયાના અન્ય દેશોની ભૂમિકા મહત્વની રહેવાની આશા છે. સંગઠનનું કહેવું છે કે દુનિયાના અર્થતંત્રોમાં પ્રવૃત્તિઓ ચાલુ રહેવાથી ઓઈલની માગને સમર્થન મળશે. વિશેષરૂપે એ દેશોમાંમાગ વધવાની આશા છે, જે OECDના સભ્ય નથી. પરિવહનમાં ઉપયોગમાં લેવાનારા ઈંધણ અને પેટ્રોકેમિકલ બનાવવામાં કામ આવનારા ક્રૂડ ઓઈલનીમાગ પણ ઓઈલનો વપરાશ વધારવામાં મદદ કરી શકે છે.

2026માં ઓઈલનો વપરાશ વધશે

ઓપેકનો અંદાજ છે કે 2026માં દુનિયામાં ઓઈલની માગ દૈનિક અંદાજે 4 લાખ બેરલ વધશે. લેટિન અમેરિકા અને ઓઈસીડીના સભ્ય ન હોય તેવા એશિયન દેશોમાંથી માગને મજબૂત ટેકો મળવાની આશા છે. આર્થિક પ્રવૃત્તિઓ, લોકોનું પરિવહન, હવાઈ પ્રવાસ અને અંગત રોકાણમાં સ્થિરતા આ વધારાનું કારણ હશે. ઓઈસીડીના સભ્ય ન હોય તેવા દેશોમાં ઓઈલની માગ 2026માં દૈનિક અંદાજે 5 લાખ બેરલ વધીને સરેરાશ 5.97 કરોડ બેરલ રહેવાનો અંદાજ છે. તેનાથી વિપરિત ઓઈસીડી દેશોમાં ઓઈલની માગમાં ઘટાડો થવાની આશા છે. આ દેશોમાં 2026 દરમિયાન માગ પાછલા વર્ષની સરખામણીમાં દરરોજ 1.10 લાખ બેરલ ઘટીને સરેરાશ 4.61 કરોડ બેરલ રહી શકે છે. યુરોપ અને એશિયા-પ્રશાંત ક્ષેત્રમાં ઓઈલની માગ ઘટવાનો અંદાજ છે.

2027માં ઓઈસીડી દેશોમાં પણ વધી શકે છે ક્રૂડની માગ

ઓપેકનું માનવું છે કે 2027માં ઓઈસીડી દેશોમાં પણ ઓઈલની માગ દરરોજ અંદાજે 4 લાખ બેરલ વધી શકે છે. આ વધારામાં યુરોપ અને એશિયા-પ્રશાંત ક્ષેત્રની મહત્વની ભૂમિકા રહેવાની આશા છે. બીજીબાજુ ઓઈસીડીના સભ્ય ના હોય તેવા દેશોમાં ઓઈલની માગ 2027માં દૈનિક અંદાજે 20 લાખ બેરલ વધવાનું અનુમાન છે. આ રીતે સંગઠન મુજબ 2027માં દુનિયાભરમાં ઓઈલની માગ વધવામાં નોન-ઓઈસીડી દેશોનું યોગદાન ઘણું મહત્વનું હશે.

ઓઈલનું ઉત્પાદન આ દેશોમાં વધશે : ઓપેક

ઓપેક મુજબ ડેક્લેરેશન ઓફ કોઓપરેશનથી બહારના દેશોમાં ઓઈલ અને અન્ય લિક્વિડ ફ્યુઅલનું ઉત્પાદન 2026 અને 2027 બંને વર્ષમાં દૈનિક અંદાજે 6 લાખ બેરલ વધવાનો અંદાજ છે. 2026માં બ્રાઝીલ, અમેરિકા, કેનેડા અને આર્જેન્ટિના ઉત્પાદન વધવામાં મહત્વની ભૂમિકા ભજવી શકે છે. બીજીબાજુ 2027માં કતાર, કેનેડા, બ્રાઝીલ અને આર્જેન્ટિનામાંથી ઉત્પાદન વધવાની આશા છે. ઓપેક મુજબ 2026માં દુનિયાભરમાં ઓઈલ અને ગેસની શોધ તથા ઉત્પાદન પર થનારા કુલ મૂડીખર્ચ અંદાજે 2 ટકા ઘટીને 613 અબજ ડોલર રહી શકે છે. જોકે, 2027માં તેમાં ફરીથી તેજી આવવાનો અંદાજ છે. સંગઠન મુજબ આ ખર્ચ 6 ટકા વધીને અંદાજે 651 અબજ ડોલર પહોંચી શકે છે.

દુનિયાના અર્થતંત્ર અંગે ઓપેકનું અનુમાન

ઓપેકનું કહેવું છે કે ભવિષ્યમાં ઊર્જાની માગ પૂરી કરવા અને જરૂર પડતા ઓઈલનું વધારાનું ઉત્પાદન કરવાની ક્ષમતા જાળવી રાખવા માટે ઓઈલ ઉત્પાદન સાથે સંકળાયેલા પ્રારંભિક કામોમાં સતત રોકાણ જરૂરી રહેશે. ઓપેકે વૈશ્વિક અર્થતંત્રમાં મજબૂતી જળવાઈ રહેવાનો અંદાજ વ્યક્ત કર્યો છે. સંગઠન મુજબ દુનિયાનો આર્થિક વૃદ્ધિદર 2026માં 3 ટકા અને 2027માં 3.2 ટકા રહી શકે છે. ભારતનો આર્થિક વૃદ્ધિદર 2026માં 6.6 ટકા રહેવાનો અંદાજ છે. બીજીબાજુ 2027માં તે 6.5 ટકા રહેવાની આશા છે. આ રીતે ઓપેકના અંદાજ મુજબ 2027માં દુનિયામાં ઓઈલની માગ વધવાની સાથે ભારત અને એશિયાના અન્ય દેશોની ભૂમિકા મહત્વની રહી શકે છે.

આ પણ જૂઓ

Watch onYouTube