દેશના 40 ટકા કોલસા આધારિત વીજ એકમોમાં કોલસાની અછત : સરકારી ડેટા

નવી દિલ્હી : ભારતના કોલસા આધારિત વીજ એકમોમાંથી અંદાજે 40 ટકા એકમોમાં કોલસાનો જથ્થો અત્યંત ઓછો છે. અલ નીનોના કારણે ચોમાસાના સમયમાં પણ ગરમી વચ્ચે વીજળીનીમાગ વધવાના કારણે ઈંધણનો જથ્થાની અછત સર્જાઈ હોવાનું સરકારી આંકડા પરથી જણાય છે.

સેન્ટ્રલ ઈલેક્ટ્રિસિટી ઓથોરિટીના ડેટા મુજબ જરૂરી ઈન્વેન્ટરીના 25 ટકાથી ઓછા જથ્થા અથવા ત્રણ દિવસથી પણ ઓછી વીજળી પેદા થઈ શકે તેટલા કોલસાના જથ્થાથી ચાલતા કોલસા આધારિત વીજ એકમોની સંખ્યા વધીને 19 સપ્ટેમ્બરે 74 થઈ ગઈ છે. ગયા સપ્તાહે આ એકમોની સંખ્યા 60 જેટલી હતી.

ભારતની વીજળીની મહત્તમ જરૂરિયાતનો માપદંડ એવી પીક પાવર ડીમાન્ડ ગયા સપ્તાહે 230 ગીગાવોટથી 250 ગીગાવોટ વચ્ચે રહી હતી. પીક પાવર ડીમાન્ડ આ વર્ષે મે મહિનામાં 270.70 ગીગાવોટની સર્વોચ્ચ સપાટીએ હતી.વીજએકમોમાં કોલસાના જથ્થામાં ઘટાડો માળખાગત પૂરવઠા ખેંચના બદલે કામચલાઉ લોજિસ્ટિકલ સમસ્યા છે તેમ ક્રિસિલના વિશ્લેષકોએ જણાવ્યું હતું. ભારતના કોલસા અને રેલવે મંત્રાલયોએ જણાવ્યું હતું કે, અનિયમિત ચોમાસાની મોસમમાં શિપમેન્ટ્સ પર અસર થયા પછી સપ્ટેમ્બરના પ્રારંભમાં વીજ એકમોને પુરવઠો વધારવામાં આવ્યો હતો.

વૈકલ્પિક ઊર્જા ઉત્પાદન એપ્રિલથી ઓગસ્ટ વચ્ચે 21 ટકા વધ્યું છે, પરંતુ સ્વચ્છ ઊર્જાની અનિયમિત પ્રકૃતિના કારણે કોલસા આધારિત વીજળીએ 24 કલાક વીજમાગ પૂરી કરવામાં મહત્વની ભૂમિકા ભજવવાનું ચાલુ રાખ્યું છે તેમ ક્રિસિલે જણાવ્યું હતું. દરમિયાન ઈન્ડિયન પાવર પ્રોડ્યુસર્સની કોલસાની આયાત ઓગસ્ટમાં 15 મહિનાની ટોચે પહોંચી હતી. હીટવેવના કારણે વીજળીની માગમાં તિવ્ર વધારો થયો હતો.

આ પણ જૂઓ

Watch onYouTube