ભારતીય અર્થતંત્રનું ‘ગ્રોથ એન્જિન’ ફૂલ સ્પીડમાં! Fitch 6.9%, S&P 7%

વૈશ્વિક રેટિંગ એજન્સી Fitch Ratingsએ ભારતની આર્થિક વૃદ્ધિ અંગેનો અંદાજ સુધારીને FY27 માટે GDP ગ્રોથનો અનુમાન 6.9% કર્યો છે. અગાઉ Fitchએ ભારતની વૃદ્ધિનો અંદાજ 6.5% રાખ્યો હતો. જ્યારે વૈશ્વિક રેટિંગ એજન્સી S&P Global Ratingsએ FY27 માટે ભારતના GDP ગ્રોથનો અંદાજ 6.6%થી વધારીને 7% કર્યો છે. મજબૂત સ્થાનિક માંગ, નાણાકીય નીતિમાં સરળતા અને તાજેતરના આર્થિક પ્રદર્શનને ધ્યાનમાં રાખીને આ સુધારો કરવામાં આવ્યો છે.

Fitch

ભારતીય અર્થતંત્રને લઈને વૈશ્વિક રેટિંગ એજન્સી Fitch Ratingsનો વિશ્વાસ વધ્યો છે. Fitchએ પોતાના તાજા અનુમાનમાં નાણાકીય વર્ષ 2026-27 માટે ભારતના GDP વૃદ્ધિ દરનો અંદાજ વધારીને 6.9% કર્યો છે. અગાઉ Fitchએ ભારતની આર્થિક વૃદ્ધિ 6.5% રહેવાનો અંદાજ વ્યક્ત કર્યો હતો. જોકે, તાજેતરના આર્થિક આંકડા અને મજબૂત સ્થાનિક પ્રવૃત્તિઓને ધ્યાનમાં રાખીને એજન્સીએ પોતાના અનુમાનમાં સુધારો કર્યો છે. Fitchના જણાવ્યા અનુસાર, ભારતનો વિકાસ દર અગાઉની અપેક્ષાઓ કરતાં વધુ મજબૂત રહ્યો છે. ખાસ કરીને સ્થાનિક વપરાશ, રોકાણ પ્રવૃત્તિ અને અર્થતંત્રના વિવિધ ક્ષેત્રોમાં જોવા મળેલી ગતિએ વૃદ્ધિને ટેકો આપ્યો છે.

S&P Global

S&P Globalએ હવે ભારતનો GDP વૃદ્ધિ દર 7% રહેવાનો અંદાજ વ્યક્ત કર્યો છે, જે અગાઉના 6.6%ના અનુમાન કરતાં વધારે છે. એજન્સીના જણાવ્યા અનુસાર, ભારતની અર્થવ્યવસ્થાએ અપેક્ષા કરતાં વધુ સારી કામગીરી કરી છે, જેના કારણે વૃદ્ધિનો અંદાજ સુધારવામાં આવ્યો છે. S&P Globalના મતે ભારતના વિકાસને સૌથી મોટો ટેકો સ્થાનિક માંગ અને મજબૂત વપરાશથી મળી રહ્યો છે. દેશમાં વધતી આવક, શહેરીકરણ, ઈન્ફ્રાસ્ટ્રક્ચર રોકાણ અને સેવાઓ ક્ષેત્રની ગતિ આર્થિક પ્રવૃત્તિ વધારવામાં મહત્વપૂર્ણ ભૂમિકા ભજવી રહી છે. આ ઉપરાંત, વ્યાજદરમાં નરમાઈ અને નાણાકીય પરિસ્થિતિમાં સુધારો પણ રોકાણ અને વપરાશને પ્રોત્સાહન આપી શકે છે.

વૈશ્વિક જોખમો પર નજર

જોકે, વૈશ્વિક સ્તરે હજુ પણ કેટલાક પડકારો યથાવત છે. આંતરરાષ્ટ્રીય વેપારમાં અનિશ્ચિતતા, ભૂરાજકીય તણાવ, કોમોડિટી ભાવમાં વધઘટ અને વૈશ્વિક નાણાકીય સ્થિતિ ભારતની વૃદ્ધિને અસર કરી શકે છે. રેટિંગ એજન્સીઓના મતે, ભારત માટે લાંબા ગાળાની મજબૂત વૃદ્ધિ જાળવવા માટે ઉત્પાદન ક્ષમતા વધારવી, રોજગાર સર્જન અને માળખાકીય સુધારા મહત્વપૂર્ણ રહેશે.

રેટિંગ એજન્સીઓનો વધતો વિશ્વાસ

તાજેતરમાં અન્ય વૈશ્વિક રેટિંગ એજન્સીઓએ પણ ભારતની વૃદ્ધિ અંગે સકારાત્મક વલણ દર્શાવ્યું છે. S&P Globalનો આ સુધારેલો અંદાજ ભારતની આર્થિક સ્થિરતા અને વિકાસ ક્ષમતા અંગે આંતરરાષ્ટ્રીય વિશ્વાસ વધતો હોવાનો સંકેત આપે છે. Fitchએ જણાવ્યું છે કે ભારતની લાંબા ગાળાની વૃદ્ધિ માટે નીતિ સુધારા, રોકાણમાં વધારો અને ઉત્પાદન ક્ષમતામાં વિસ્તરણ મહત્વપૂર્ણ રહેશે.

આ પણ વાંચો: Moody’sએ ભારતનો GDP વૃદ્ધિદરનો અંદાજ 7% કર્યો

આ પણ જુઓ:

Watch onYouTube