Jio Platforms IPO: માત્ર 100 મિનિટમાં સંપૂર્ણ છલકાયો, મેગા ઈશ્યૂમાં સૌથી ઝડપી ભરાવાનો વિક્રમ બન્યો

Jio Platforms IPO: ટેલિકોમ ક્ષેત્રની દિગ્ગજ કંપની 'જિયો પ્લેટફોર્મ્સ લિમિટેડ' (Jio Platforms Ltd)નો 30,213 કરોડ રૂપિયાનો IPO બુધવારે ખુલ્યાના 100 મિનિટની અંદર જ સંપૂર્ણપણે સબસ્ક્રાઇબ થઈ ગયો હતો. દેશના અત્યાર સુધીના સૌથી મોટા આ IPOમાં સંસ્થાકીય રોકાણકારોએ શરૂઆતમાં જ ભારે રસ દાખવ્યો હતો, જેના પરિણામે આ ઇશ્યૂ ભારતની મોટી જાહેર ઓફરોમાં સૌથી ઝડપથી સંપૂર્ણ સબસ્ક્રાઇબ થનારો ઇશ્યૂ બની ગયો છે.

સ્ટોક એક્સચેન્જના ડેટા અનુસાર, બપોરે 12:33 વાગ્યા સુધીમાં, ઓફર કરવામાં આવેલા 19.75 કરોડ શેરની સામે 28.31 કરોડ શેર માટે બિડ મળી હતી, એટલે કે કુલ સબસ્ક્રિપ્શન 1.43 ગણું થયું છે. આ IPO 23 ઓક્ટોબર સુધી ખુલ્લો રહેશે.

Jio Platforms Limitedના IPOમાં સંસ્થાકીય ખરીદદારો Qualified Institutional Buyers-QIB તરફથી મજબૂત માંગ જોવા મળી હતી. તેમના માટે અનામત રાખવામાં આવેલા હિસ્સા સામે 4.13 ગણી અરજીઓ આવી હતી; જેમાં 4.90 કરોડ શેરની ઓફર સામે 20.23 કરોડ શેર માટે બોલી લગાવવામાં આવી હતી. બેંકો અને વીમા કંપનીઓ સહિતની સ્થાનિક નાણાકીય સંસ્થાઓએ 13.40 કરોડ શેર માટે બોલી લગાવી હતી, જ્યારે વિદેશી સંસ્થાકીય રોકાણકારોએ 5.94 કરોડ શેરની ડિમાન્ડ કરી હતી.

NSE પ્લેટફોર્મ પર ઉપલબ્ધ ડેટા અનુસાર, સવારે 10:35 વાગ્યા સુધીમાં ક્વોલિફાઇડ ઇન્સ્ટિટ્યૂશનલ બાયર્સ (QIBs) માટે અનામત રાખવામાં આવેલો હિસ્સો 3.25 ગણો સબસ્ક્રાઇબ થયો હતો. નોન-ઇન્સ્ટિટ્યૂશનલ ઇન્વેસ્ટર્સ (NIIs) માટે અનામત હિસ્સો 26 ટકા સબસ્ક્રાઇબ થયો હતો, જ્યારે રિટેલ ઇન્વેસ્ટર્સની શ્રેણીમાં 23 ટકા સબસ્ક્રિપ્શન જોવા મળ્યું હતું. NSEના ડેટા મુજબ, એકંદરે આ ઇશ્યૂ 1.01 ગણો સબસ્ક્રાઇબ થયો હતો, જેમાં 19.75 કરોડ શેરની ઓફર સામે 20.03 કરોડ શેર માટે બિડ મળી હતી.

IPO Subscription Status 10:55 AM

એન્કર બુક માટે લગભગ ₹2.5 લાખ કરોડની માંગ

આપેલી માહિતી અનુસાર, Jio Platformsના IPOની એન્કર બુક માટે રોકાણકારોની માંગ લગભગ ₹2.5 લાખ કરોડ સુધી પહોંચી હતી. આટલી મોટી રકમની એન્કર બિડ આકર્ષનારો પ્રથમ ભારતીય IPO બન્યો હોવાની વિગતો મળી છે. એન્કર બુક માટે આવેલી કુલ માંગ અને કંપનીએ એકત્ર કરેલી રકમ અલગ છે. લગભગ ₹2.5 લાખ કરોડની માંગ સામે કંપનીએ એન્કર રોકાણકારોને શેર ફાળવીને ₹8,109.84 કરોડ મેળવ્યા હતા.

212 એન્કર રોકાણકારો પાસેથી ₹8,109.84 કરોડ એકત્ર

જાહેર સબસ્ક્રિપ્શન પહેલાં પણ Jio Platformsને એન્કર રોકાણકારો તરફથી મોટો પ્રતિસાદ મળ્યો હતો. કંપનીએ 19 ઑક્ટોબરે 212 એન્કર રોકાણકારો પાસેથી ₹8,109.84 કરોડ એકત્ર કર્યા હતા. આ રોકાણકારોમાં BlackRock, Capital Group, Fidelity Investments, T. Rowe Price, Schroders, JPMorgan Asset Management, Franklin Templeton, Invesco અને Prudential જેવી અગ્રણી સંસ્થાઓ સામેલ હતી.

કુલ ઇશ્યૂ 56% ભરાયો

સંસ્થાકીય રોકાણકારોની સરખામણીએ અન્ય કેટેગરીમાં શરૂઆતની માંગ ઓછી રહી હતી. નોન-ઇન્સ્ટિટ્યૂશનલ ઇન્વેસ્ટર્સ—NII માટેનો હિસ્સો 11% ભરાયો હતો. બીજી તરફ, રિટેલ એટલે કે છૂટક રોકાણકારોના હિસ્સામાં 8% સબસ્ક્રિપ્શન નોંધાયું હતું. તમામ કેટેગરીને મળીને ઇશ્યૂનું એકંદર સબસ્ક્રિપ્શન 56% થયું હતું. અહીં QIBનો હિસ્સો સંપૂર્ણ ભરાયો હોવાનો અર્થ આખો IPO સંપૂર્ણ ભરાઈ ગયો એવો નથી; દરેક કેટેગરી માટે અલગ હિસ્સો ફાળવાયેલો હોય છે.

આ પણ વાંચો: Jio Platform IPO: આજે ખુલશે Jioનો IPO, અરજી પહેલાં જાણો GMP અને 10 મહત્વની વિગતો

આ પણ જુઓ:

Watch onYouTube