Gold-Silver Buying: ધનતેરસ-દિવાળીમાં સોનાની ખરીદીનો જોરદાર ક્રેઝ, ભારતીયોએ ₹72,000 કરોડનું 52 ટન સોનું ખરીદ્યું

ધનતેરસ અને દિવાળીનો તહેવાર એટલે ભારતમાં પરંપરાગત રીતે સોનું ખરીદવાનો સમય ગણવામાં આવે છે. આ બે તહેવાર પર ભારતીયો સૂકનના નામે સોનું અને ચાંદીની અઢળક પ્રમાણમાં ખરીદી કરે છે. ત્યારે આ વર્ષે પણ ગ્રાહકો પાછા નથી રહ્યા ભારતમાં સોનાની ખરીદી માટે ધનતેરસ અને દિવાળી પરંપરાગત રીતે મહત્વનો સમય ગણાય છે અને આ વર્ષે પણ ગ્રાહકોએ જોરદાર ખરીદી કરી છે. ઇન્ડિયા બુલિયન એન્ડ જ્વેલર્સ એસોસિએશનના જણાવ્યા મુજબ ધનતેરસ અને દિવાળી દરમિયાન સોનાની ખરીદી માત્રાના ધોરણે 30% વધી છે અને કુલ 52 ટન સોનું વેચાયું છે. આ સોનાની કુલ કિંમત આશરે ₹72,000 કરોડ રહી છે.

ભાવમાં ઘટાડાથી ગ્રાહકો ફરી બજારમાં આવ્યા

સોનાના ભાવ જાન્યુઆરી 2026માં પ્રતિ 10 ગ્રામ આશરે ₹1.8 લાખના ઊંચા સ્તર સુધી પહોંચ્યા હતા. ત્યારબાદ ભાવમાં લગભગ 21%નો ઘટાડો થઈ તે આશરે ₹1.42 લાખ પ્રતિ 10 ગ્રામ સુધી આવ્યો. આ ઘટાડાથી ઘણા એવા ગ્રાહકો ફરી બજારમાં આવ્યા, જેઓ ઊંચા ભાવને કારણે ખરીદી ટાળી રહ્યા હતા. ઉદ્યોગ સાથે જોડાયેલા જાણકારોના જણાવ્યા મુજબ તહેવારોની પરંપરાગત માંગ સાથે ભાવમાં આવેલા ઘટાડાએ ખરીદી વધારવામાં મહત્વની ભૂમિકા ભજવી.

ઊંચા ભાવ છતાં માંગ યથાવત

નિષ્ણાતો અનુસાર ધનતેરસ અને દિવાળીની પરંપરાગત ખરીદી સાથે લગ્નસરાની માંગે સોનાની ખરીદીને ટેકો આપ્યો. જોકે સપ્ટેમ્બર ક્વાર્ટરમાં સોનાના ભાવ ગયા વર્ષની સરખામણીએ લગભગ 40%થી 45% વધુ હતા. તેથી ઊંચા ભાવને કારણે ગ્રાહકોની ખરીદ શક્તિ પર દબાણ યથાવત રહ્યું. એટલે ગ્રાહકોએ સોનું ખરીદવાનું બંધ કર્યું નથી, પરંતુ ખરીદીની રીતમાં ફેરફાર કર્યો છે.

જ્વેલર્સના વેચાણમાં લગભગ 25% વધારો

તહેવારો દરમિયાન મોટા જ્વેલર્સના વેચાણમાં પણ સારો વધારો જોવા મળ્યો છે. જોયાલુક્કાસે ધનતેરસ-દિવાળી દરમિયાન કુલ વેચાણમાં લગભગ 25%નો વધારો નોંધાવ્યો. કંપનીના જણાવ્યા મુજબ પરંપરાગત સોનાના દાગીના, હળવા વજનના દૈનિક ઉપયોગના દાગીના અને સોનાના સિક્કામાં સારી માંગ રહી. સેન્કો ગોલ્ડે પણ ગયા વર્ષની સરખામણીએ વેચાણ મૂલ્યમાં 25%થી વધુનો વધારો નોંધાવ્યો.

લગ્નસરાની સિઝને પણ માંગ વધારી

આ વર્ષે ધનતેરસ 6 નવેમ્બરે આવી હતી, જ્યારે શિયાળાની લગ્નસરાની સિઝન 20 નવેમ્બરથી શરૂ થવાની હતી. આ કારણે ઘણા પરિવારો માટે તહેવારો અને લગ્નની ખરીદી એકસાથે આવી ગઈ. પરિણામે દાગીનાની માંગને વધારાનો ટેકો મળ્યો. ભાવમાં ઘટાડો થતા અનેક ગ્રાહકોએ લગ્ન માટે જરૂરી દાગીનાની ખરીદી વહેલી કરી અને આગળ ભાવ ફરી વધે તે પહેલાં ખરીદી પૂર્ણ કરી.

આ પણ વાંચો: Crude Oil Price: બ્રેન્ટ ક્રૂડ $95ની નજીક, ભારતના પેટ્રોલ-ડીઝલ પર શું થશે અસર?

જૂના સોનાની બદલી પણ બની મોટો આધાર

ઘણા ગ્રાહકોએ સીધી નવી ખરીદી કરવા કરતાં જૂના સોનાની બદલી કરીને નવા દાગીના ખરીદવાનું પસંદ કર્યું. ઉદ્યોગના જણાવ્યા મુજબ જૂના સોનાની બદલીની સુવિધાએ ગ્રાહકોને મોટી રોકડ રકમ ખર્ચ્યા વગર નવા દાગીના ખરીદવામાં મદદ કરી. તહેવારો મહિનાની શરૂઆતમાં આવતા ઘણા પરિવારોને પગાર મળ્યા પછી ખરીદ શક્તિમાં પણ વધારો થયો.

હીરાના વેચાણમાં પણ તેજી

તહેવારોમાં માત્ર સોનું જ નહીં, પરંતુ કુદરતી હીરાની માંગમાં પણ સારો વધારો જોવા મળ્યો. આ વર્ષે કુદરતી હીરાનું વેચાણ છેલ્લા આઠ વર્ષમાં બીજા સૌથી ઊંચા સ્તરે રહ્યું. તો રંગીન રત્નોના દાગીનાની માંગમાં લગભગ 35%થી 40%નો વાર્ષિક વધારો જોવા મળી રહ્યો છે. ગ્રાહકો હવે માત્ર ધાતુના વજનને આધારે ખરીદી કરતા નથી, પરંતુ ડિઝાઇન અને અલગ દેખાવને પણ વધુ મહત્વ આપી રહ્યા છે.

સોનાના ભાવ હજી ઊંચા હોવા છતાં તહેવારોની પરંપરા, ભાવમાં તાજેતરનો ઘટાડો અને લગ્નસરાની માંગને કારણે આ વર્ષની ધનતેરસ-દિવાળી સિઝન જ્વેલર્સ માટે મજબૂત રહી છે. ગ્રાહકોએ સોનું ખરીદવાનું ચાલુ રાખ્યું, પરંતુ ભારે દાગીનાની જગ્યાએ હળવા વજન, નાના સિક્કા અને ઓછા કેરેટના વિકલ્પો તરફ વધુ વલણ બતાવ્યું.

આ પણ જુઓ

Watch onYouTube