રોકાણકારો એલર્ટ: આવતીકાલે શેરબજાર રહેશે બંધ, BSE-NSE માં ટ્રેડિંગ કેમ અટકી જશે?

Stock Market Holidays: દિવાળીના પવિત્ર તહેવાર નિમિત્તે શેરબજારના રોકાણકારો માટે એક મહત્ત્વની અપડેટ છે. આવતીકાલે, મંગળવાર, 10 નવેમ્બર, 2026ના રોજ દેશના બંને મુખ્ય શેરબજારો - BSE (બોમ્બે સ્ટોક એક્સચેન્જ) અને NSE (નેશનલ સ્ટોક એક્સચેન્જ) બંધ રહેશે. દિવાળી-બલિપ્રતિપદાના તહેવારને કારણે બજારમાં સત્તાવાર રજા જાહેર કરવામાં આવી છે, તેથી મંગળવારે કોઈ પણ પ્રકારનું ટ્રેડિંગ (લે-વેચ) થઈ શકશે નહીં. બજાર હવે સીધું બુધવારે રાબેતા મુજબ ખુલશે. નોંધનીય છે કે, સામાન્ય રીતે શનિવાર અને રવિવારે બજાર બંધ હોય છે, પરંતુ દિવાળીના કારણે આ વર્ષે શનિવારે બજાર ખુલ્યું હતું. જોકે, તે સામાન્ય સત્ર નહોતું, પરંતુ માત્ર એક કલાક માટેનું 'મુહૂર્ત ટ્રેડિંગ' હતું.

આઠ વર્ષ જૂનો ટ્રેન્ડ તૂટ્યો: મુહૂર્ત ટ્રેડિંગમાં નોંધાયો ઘટાડો

દિવાળી નિમિત્તે રવિવારે યોજાયેલા ખાસ 'મુહૂર્ત ટ્રેડિંગ' સત્રમાં એક આશ્ચર્યજનક ટ્રેન્ડ જોવા મળ્યો હતો. સામાન્ય રીતે મુહૂર્ત ટ્રેડિંગના દિવસે બજારમાં હંમેશાં તેજી જોવા મળતી હોય છે, પરંતુ આઠ વર્ષ પછી આ વર્ષે સ્થાનિક શેરબજારમાં ઘટાડો નોંધાયો છે. હિન્દુ કેલેન્ડર મુજબ નવા વર્ષ સંવત 2083 ની શરૂઆત માટે યોજાયેલા આ સત્રમાં, શરૂઆતમાં 30 શેરો ધરાવતો BSE સેન્સેક્સ મજબૂત ખુલ્યો હતો, પરંતુ તે પોતાના વધારાને ટકાવી શક્યો ન હતો. અંતે, સેન્સેક્સ 28.62 પોઈન્ટ એટલે કે 0.04 ટકાના સામાન્ય ઘટાડા સાથે 80,999.40ની સપાટી પર બંધ થયો હતો. નિફ્ટીમાં પણ થોડો ઘટાડો જોવા મળ્યો હતો. નિષ્ણાતોના મતે, બજારમાં સતત સાત સત્રોથી જે ઉછાળો જોવા મળી રહ્યો હતો, તેના કારણે રોકાણકારોએ આ ખાસ સત્રમાં પોતાનો નફો બુક કરવાનું શરૂ કર્યું (પ્રોફિટ બુકિંગ), જેના પરિણામે બજારમાં દબાણ આવ્યું અને છેલ્લા આઠ વર્ષથી મુહૂર્ત ટ્રેડિંગમાં જોવા મળતી જીતની હારમાળા તૂટી ગઈ.

મુહૂર્ત ટ્રેડિંગ શું છે?

મુહૂર્ત ટ્રેડિંગ એ દિવાળીના શુભ પ્રસંગે ભારતીય શેરબજારમાં યોજાતું એક પ્રતીકાત્મક ટ્રેડિંગ સત્ર છે, જે નવા હિન્દુ કેલેન્ડર વર્ષની શરૂઆતનું પ્રતીક છે. ભારતીય પરંપરા અને રોકાણકારોની માન્યતા અનુસાર, આ 'મુહૂર્ત' અથવા શુભ સમયગાળા દરમિયાન ટ્રેડિંગ કરવાથી વર્ષ દરમિયાન સમૃદ્ધિ, નાણાકીય પ્રગતિ અને લક્ષ્મીજીની કૃપા પ્રાપ્ત થાય છે.

રૂપિયાની સ્થિતિ મજબૂત બની

સ્થાનિક શેરબજારોમાં ઘટાડા વચ્ચે રૂપિયામાં મજબૂતાઈ જોવા મળી હતી. સોમવારે સવારના શરૂઆતના વેપારમાં ડોલર સામે રૂપિયો 24 પૈસા મજબૂત થઈને 93.74 ના સ્તરે પહોંચી ગયો હતો. આંતરરાષ્ટ્રીય બજારમાં કાચા તેલ (ક્રૂડ ઓઈલ) ના ભાવમાં આવેલી નરમાશ, વિદેશી મૂડીના પ્રવાહમાં થયેલો સુધારો અને ખાસ કરીને પશ્ચિમ એશિયા (મિડલ ઈસ્ટ) માં ચાલી રહેલા તણાવમાં ઘટાડો થવાની આશાને કારણે રોકાણકારોના સેન્ટિમેન્ટને મજબૂત ટેકો મળ્યો હતો. ઇન્ટરબેંક ફોરેન એક્સચેન્જ માર્કેટમાં સવારે રૂપિયો ડોલર દીઠ 93.85 ના સ્તરે ખુલ્યો હતો અને ત્યાર બાદ વધુ મજબૂત બનીને 93.74 પર પહોંચ્યો હતો, જે તેના પાછલા બંધ દર કરતાં 24 પૈસા વધુ મજબૂત હતો.

આ પણ વાંચોઃ દરેક શેર પર થશે ₹90 કમાણી, આ કંપનીએ કરી મોટી જાહેરાત; 12 નવેમ્બર પહેલાં રાખવું પડશે આ ધ્યાન

આ પણ જુઓ

Watch onYouTube