Gold ETFમાં એક વર્ષમાં 35 ટકાનું રિટર્ન મળ્યું, ઓછા રૂપિયાથી સોનામાં રોકાણની તક

પશ્ચિમ એશિયામાં અમેરિકા-ઈરાન, હુથી બળવાખોરો-સાઉદી અરબ વચ્ચે યુદ્ધ, રશિયા-યુક્રેન વચ્ચે યુદ્ધ જેવી ભૂ-રાજકીય તણાવપૂર્ણ સ્થિતિ, ક્રૂડ ઓઈલના ભાવમાં તેજી જેવી પરિસ્થિતિઓના કારણે રોકાણકારો માટે ક્યાં રોકાણ કરવું તે મુંઝણવરૂપ બન્યું છે. જોકે, આવા સમયમાં સોનું રોકાણકારોને આકર્ષી રહ્યું છે. સોનાનો રોકાણ તરીકે ઉપયોગ કરનારા રોકાણકારો ફિઝિકલ ગોલ્ડના બદલે ડિજિટલ ગોલ્ડમાં રોકાણને વધુ પ્રાથમિક્તા આપે છે. ઓગસ્ટમાં ગોલ્ડ ETFમાં 2,596કરોડ રૂપિયાનું રોકાણ આ બાબતનો પુરાવો છે. ગોલ્ડ ETFમાં જુલાઈમાં 1,558 કરોડ રૂપિયાથી વધુનું રોકાણ થયું હતું. ગોલ્ડ ETFમાં એક વર્ષમાં 35 ટકાથી વધુનું રિટર્ન મળ્યું છે.

જેફરિઝના ગ્લોબલ ઈક્વિટી સ્ટ્રેટેજી હેડ ક્રિસ વૂડનું માનવું છે કે સોનાના ભાવમાં આગળ પણ તેજી જોવા મળી શકે છે. એવામાં તમે સોનામાં રોકાણ કરવાનો પ્લાન કરી રહ્યા હોવ તો ગોલ્ડ ETF મારફત રોકાણ કરી શકો છો.

એક્સચેન્જ ટ્રેડેડ ફંડ સોનાના ભાવમાં ઉતાર-ચઢાવ પર આધારિત હોય છે. ગોલ્ડ ETFના ખરીદી-વેચાણ શૅરોની સમાન BSE અને NSE પર કરી શકાય છે. જોકે, તેમાં આપને ફિઝિકલ સ્વરૂપમાં સોનું મળતું નથી. તમને તે ડિજિટલ સ્વરૂપમાં મળે છે. તમે ગોલ્ડ ETFમાંથી રોકાણ પાછું ખેંચવા માગો ત્યારે તમને જે-તે સમયે સોનાના ભાવ જેટલા રૂપિયા મળી જાય છે.

ગોલ્ડ ETFમાં ઘણા ઓછા રૂપિયામાં કરી શકાય છે રોકાણ

સ્ટોક માર્કેટમાં શૅર્સની જેમ ગોલ્ડ ETF યુનિટ્સ ખરીદી શકે છે. તેમાં ફિઝિકલ ગોલ્ડ ખરીદવા અને તેને મેઈન્ટેન કરવાની કોઈ ઝંઝટ નથી હોતી. તેમાં SIP મારફત રોકાણની સુવિધા મળે છે. શેરબજારમાં રોકાણની સરખામણીએ ગોલ્ડ ETFમાં રોકાણ ઓછું વોલેટાઈલ હોય છે. ગોલ્ડ ETFને ડીમેટ એકાઉન્ટ મારફત ઓનલાઈન ખરીદી શકાય છે. સોનામાં હાઈ લિક્વિડિટી જોવા મળે છે એટલે કે તમે ઈચ્છો ત્યારે તેને ખરીદી અને વેચી શકો છો. ગોલ્ડ ETFની શરૂઆત તમે ઘણા ઓછા રૂપિયાથી કરી શકો છો. ગોલ્ડ ETFનો લોન લેવા માટે સિક્યોરિટી તરીકે પણ ઉપયોગ કરી શકાય છે. ફિઝિકલ સોના પર તમને મેકિંગ ચાર્જ ચૂકવવાનો હોય છે, પરંતુ ગોલ્ડ ETFમાં એવું નથી હોતું.

ગોલ્ડ ETF ખરીદવા માટે તમારે બ્રોકરના માધ્યમથી ડીમેટ એકાઉન્ટ ખોલાવવાનું રહે છે. તેમાં NSE પર ઉપલબ્ધ ગોલ્ડ ETFના યુનિટ તમે ખરીદી શકો છો અને તેના જેટલી રકમ તમે ડીમેટ એકાઉન્ટ સાથે સંકળાયેલા બેન્ક એકાઉન્ટમાંથી કપાઈ જશે. તમારા ડીમેટ એકાઉન્ટમાં ઓર્ડર કર્યાના બે દિવસ પછી ગોલ્ડ ETF તમારા એકાઉન્ટમાં ડિપોઝીટ થઈ જાય છે. ટ્રેડિંગ ખાતા મારફત જ ગોલ્ડ ETF વેચી શકાય છે.

સોનામાં મર્યાદિત રોકાણ લાભદાયક

નિષ્ણાતો મુજબ તમને સોનામાં રોકાણ કરવું પસંદ હોય તો પણ તમારે ગોલ્ડ ETFમાં મર્યાદિત રોકાણ જ કરવું જોઈએ. કુલ પોર્ટફોલિયોના માત્ર 10થી 15 ટકા જ સોનામાં રોકાણ કરવું જોઈએ. કોઈ સંકટના સમયમાં સોનામાં રોકાણ તમારા પોર્ટફોલિયોને સ્થિરતા આપી શકે છે.