શેરબજારમાં ઘટાડો થાય તો PF ના રૂપિયા ડૂબી શકે? જાણો EPFO ક્યાં અને કેવી રીતે રોકે છે પૈસા

Provident Fund: નોકરી કરતા મોટાભાગના લોકોના દર મહિનાના પગારમાંથી પ્રોવિડન્ટ ફંડ (PF) માટે ચોક્કસ રકમ કાપવામાં આવે છે. આ રકમ નિવૃત્તિ પછીની નાણાકીય જરૂરિયાતોને પૂરી કરવા માટે એક મોટો ટેકો બને છે. એમ્પ્લોઈઝ પ્રોવિડન્ટ ફંડ ઓર્ગેનાઈઝેશન (EPFO) માત્ર આ નાણાંને સુરક્ષિત જ નથી રાખતું, પરંતુ તેના પર સારું વ્યાજ આપીને કમાણી પણ કરી આપે છે. પરંતુ, શું તમે ક્યારેય વિચાર્યું છે કે EPFO આ નાણાંનું રોકાણ ક્યાં કરે છે? જ્યારે શેરબજારમાં કડાકો બોલે છે, ત્યારે પણ તમારું PF વ્યાજ કેવી રીતે કમાઈ લે છે? ચાલો આખી પ્રક્રિયાને સરળ રીતે સમજીએ.

EPFO તમારા પૈસા ક્યાં રોકે છે?

EPFO કર્મચારીઓના PF ની રકમને કોઈ એક જ જગ્યાએ જમા નથી રાખતું. વધુ સારા વળતર અને પૂરી સુરક્ષા માટે આ નાણાંનું અલગ-અલગ નાણાકીય વિકલ્પોમાં રોકાણ કરવામાં આવે છે. આ રોકાણનો સૌથી મોટો હિસ્સો સરકારી જામીનગીરીઓ (Securities) અને સરકારી બોન્ડમાં જાય છે. આ બંને વિકલ્પો બજારમાં સૌથી વધુ સુરક્ષિત માનવામાં આવે છે અને તેમાંથી નિયમિત આવક પણ મળતી રહે છે. આ ઉપરાંત, EPFO દ્વારા કેટલીક રકમ કોર્પોરેટ બોન્ડ અને અન્ય દેવા આધારિત (Debt-based) વિકલ્પોમાં પણ રોકવામાં આવે છે, જે ફંડની આવક વધારવામાં મદદ કરે છે. શેરબજારની વાત કરીએ તો, EPFO સીધી રીતે કોઈ કંપનીના શેર ખરીદતું નથી. તેના બદલે, તે એક્સચેન્જ-ટ્રેડેડ ફંડ્સ (ETFs) નો રસ્તો અપનાવે છે. આ ફંડ્સ સેન્સેક્સ અને નિફ્ટી જેવા મુખ્ય શેરબજાર ઇન્ડેક્સમાં નોંધાયેલી ટોચની કંપનીઓમાં જ નાણાં રોકે છે.

રોકાણનો નિર્ણય કોણ લે છે?

EPFO પોતાની મરજી મુજબ ગમે તે કંપની કે સ્કીમમાં પૈસા રોકી શકતું નથી. આ માટે સરકારે કડક નિયમો અને મર્યાદાઓ નક્કી કરી છે. રોકાણની આખી પ્રક્રિયા 'સેન્ટ્રલ બોર્ડ ઓફ ટ્રસ્ટીઝ' (CBT) અને સરકારની માર્ગદર્શિકા મુજબ જ ચાલે છે. વધુમાં, નિષ્ણાત ફંડ મેનેજરો રોકાણના નિર્ણયો અને પોર્ટફોલિયો સંચાલનમાં મુખ્ય ભૂમિકા ભજવે છે. તેમનો મુખ્ય ઉદ્દેશ્ય કર્મચારીઓની જમા મૂડીને સુરક્ષિત રાખીને સૌથી વધુ વળતર મેળવવાનો હોય છે.

દર વર્ષે PF નું વ્યાજ કેવી રીતે નક્કી થાય છે?

EPFO નો વ્યાજ દર દર વર્ષે એકસરખો હોતો નથી. દર નાણાકીય વર્ષના અંતે, રોકાણમાંથી થયેલી કમાણી અને ફંડની એકંદર નાણાકીય સ્થિતિની સમીક્ષા કરવામાં આવે છે. આ સમીક્ષા બાદ CBT પીએફ માટે વ્યાજ દરની ભલામણ કરે છે. જોકે, આ ભલામણને અંતિમ મંજૂરી કેન્દ્ર સરકાર જ આપે છે. સરકારની લીલી ઝંડી મળ્યા પછી જ નવા વ્યાજ દરની સત્તાવાર જાહેરાત થાય છે. હાલમાં, EPFO સભ્યોને તેમના PF બેલેન્સ પર વાર્ષિક 8.25 ટકા વ્યાજ આપવામાં આવી રહ્યું છે. ભવિષ્યમાં ફંડની કમાણી અને અન્ય આર્થિક પરિબળોના આધારે આ દરમાં ફેરફાર થઈ શકે છે.

જો શેરબજાર ગગડે તો શું PF ના પૈસા ડૂબી શકે?

આવો ડર રાખવાની કોઈ જરૂર નથી. કારણ કે, EPFO ના તમામ નાણાં શેરબજારમાં રોકવામાં આવતા નથી. તેનો બહુ મોટો ભાગ સરકારી અને કોર્પોરેટ બોન્ડ જેવા સુરક્ષિત વિકલ્પોમાં હોય છે, જે ફંડને બજારની વધઘટ સામે રક્ષણ અને સ્થિર આવક આપે છે. બીજી તરફ, ETF દ્વારા શેરબજારમાં કરેલું રોકાણ લાંબા ગાળે સારું વળતર મેળવવાની તક આપે છે. આ રીતે, EPFO અલગ-અલગ જગ્યાએ નાણાં રોકીને જોખમને સરભર કરે છે. આ જ કારણ છે કે શેરબજારમાં રોજબરોજ થતા કડાકા કે ઉછાળાની તમારા પીએફના વ્યાજ પર કોઈ સીધી કે તાત્કાલિક અસર પડતી નથી.

આ પણ વાંચોઃ બેંક ઓફ બરોડા FD વ્યાજ દરોમાં મોટો ફેરફાર: 1 વર્ષના રોકાણ પર કેટલું મળશે વળતર?

આ પણ જુઓ

Watch onYouTube