મધ્ય-પૂર્વના તણાવથી ક્રૂડમાં ફરી તેજી, ભાવ ₹9,177ને પાર

મધ્યપૂર્વમાં ક્રૂડ ઓઈલના પૂરવઠા અંગે ચિંતાઓ વધી રહી છે. જહાજો પર વધતા હુમલા અને રશિયાના એનર્જી ઈન્ફ્રાસ્ટ્રક્ચરમાં ઊભા થઈ રહેલા અવરોધો વચ્ચે ક્રૂડ ઓઈલનો ભાવ 1.63 ટકા વધીને 9,177 રૂપિયા પર પહોંચી ગયો છે. અમેરિકન સેન્ટ્રલ કમાન્ડે પુષ્ટી કરી છે કે ઈરાન તરફથી છોડવામાં આવેલા એક પ્રોજેક્ટાઈલે સિંગાપુરના ધ્વજવાળા એક કન્ટેનર જહાજને ડૂબાડી દીધું. આ ઘટનાથી ઓઈલના સપ્લાયની ચિંતા વધી ગઈ છે, જેથી ટેન્કરોનું ભાડું વિક્રમી ઊંચાઈ પર પહોંચી ગયું છે.

ઈરાન-યુક્રેન યુદ્ધના કારણે ક્રૂડના ભાવ ઘટવાની શક્યતા નહિવત્

રશિયાના કેટલાક શેડો ફ્લીટ ટેન્કરો પર લાગેલા પ્રતિબંધો દૂર કરવાના અમેરિકાના સંભવિત પગલાંથી આંશિક રાહત મળી છે. તેનાથી શિપિંગમાં ફ્લેક્સિબિલિટી આવી શકે છે અને માલ પરિવહનનો ખર્ચ ઘટી શકે છે. જોકે, પ્રાદેશિક સંઘર્ષ અને રશિયન રિફાઈનરીઓ પર યુક્રેનના હુમલાના કારણે કિંમતોમાં વધુ ઘટાડો આવી શકશે નહીં. અમેરિકામાં ક્રૂડ ઓઈલનો સ્ટોક ઝડપથી ઘટી રહ્યો છે. એનર્જી ઈન્ફર્મેશન એડમિનિસ્ટ્રેશન (EIA)ના રિપોર્ટ મુજબ 9 ઓક્ટોબરે પૂરા થયેલા સપ્તાહમાં સ્ટોક 8.6 મિલિયન બેરલ ઘટીને 415.6 મિલિયન બેરલ રહી ગયો. તે 2,88,000 બેરલના ઘટાડાના અંદાજથી ઘણો વધુ છે.

અમેરિકામાં ગેસોલીનનો સ્ટોક 3.5 મિલિયન બેરલ વધીને 208.3 મિલિયન બેરલ થઈ ગયો જ્યારે ડિસ્ટિલેટ સ્ટોક 2.5 મિલિયન બેરલ ઘટીને 102.6 મિલિયન બેરલ રહી ગયો. રિફાઈનરીનો ઉપયોગ 0.8 ટકા પોઈન્ટ વધીને 93.5 ટકા થઈ ગયો અને ક્રૂડ ઓઈલની નેટ આયાત 5,96,000 બેરલ પ્રતિ દિન ઘટી ગઈ.

ઓપેકે ઓઈલની માગનું અનુમાન ઘટાડીને દૈનિક 4 લાખ બેરલ કર્યું

આંતરરાષ્ટ્રીય એનર્જી એજન્સી (IEA) મુજબ, સપ્ટેમ્બરમાં રશિયાનું ક્રૂડ ઓઈલનું ઉત્પાદન 65,000 બેરલ પ્રતિ દિન વધીને 8.43 મિલિયન બેરલ થઈ ગયું હતું. જોકે, આ આંકડો ગયા વર્ષના સ્તરથી હજુ પણ 8,70,000 બેરલ પ્રતિ દિન ઓછો છે. રશિયાથી ક્રૂડ ઓઈલની નિકાસ વધીને દૈનિક 5.3 મિલિયન બેરલ થઈ ગઈ, જ્યારે યુક્રેનના હુમલાનાકારણે રિફાઈનરીઓના કામકાજ પર અસર થઈ હતી. ઓપેકે 2026 માટે ઓઈલની માગમાં વધારાનું તેનું અનુમાન ઘટાડી દીધું છે. વર્ષની શરૂઆતમાં આ અંદાજ 1.4 મિલિયન બેરલ પ્રતિ દિવસ હતો, જેને હવે ઘટાડીને 4,00,000 બેરલ પ્રતિ દિવસ કરવામાં આવ્યો છે. જોકે, 2027 માટે તેનું આઉટલૂક વધાર્યું છે, કારણ કે માનવામાં આવે છે કે ત્યાં સુધીમાં પૂરો થઈ ગયેલો સ્ટોક ફરીથી ભરવાની જરૂર પડશે. ઓપેકે જણાવ્યું કે, સપ્ટેમ્બરમાં ઓપેક પ્લસ જૂથના કુલ ઉત્પાદનમાં વધારો થયો છે.

ટેકનિકલ રૂપે ક્રૂડ ઓઈલમાં નવી ખરીદી જોવા મળી રહી છે. તેમાં ઓપન ઈન્ટરેસ્ટ 42.33 ટકા વધીને 10,588 કોન્ટ્રાક્ટ્સ પર પહોંચી ગયો છે અને કિંમતમાં પણ 147 રૂપિયાનો વધારો થયો છે, જે બજારમાં તેજી તરફ વલણ રાખનારાની વધતી ભાગીદારી દર્શાવે છે. તાત્કાલિક સપોર્ટ 8,935 રૂપિયા પર છે. ભાવ તેનાથી નીચે જશે તો તે 8690 રૂપિયાના સ્તર સુધી જઈ શકે છે. પ્રતિકારક સ્તર 9,310 રૂપિયા પર છે અને ભાવ આ સ્તરથી ઉપર રહેશે તો તે 9,445 રૂપિયા તરફ વધી શકે છે.

આ પણ જૂઓ